"Қазгидромет" РМК дерегінше, теңіздің тайыздану процесі әлі жалғасады, тіпті бұл одан да арта түсуі ықтимал.
Сарапшылар Каспий деңгейінің төмендеуіне басты екі себепті атайды: олар – климаттың өзгеруі мен адам факторы, деп хабарлайды inbusiness.kz сайты.
Community Climate System Model атты климаттық модельдің RCP4.5 және RCP8.5 сценарийлері бойынша жүргізілген есептерге сай, ғасырдың ортасына қарай теңіз деңгейі тағы 2 метрге төмендеуі ықтимал. Негізінен Каспий теңізінің тартылуы 2006 жылдан бері байқалып келеді.
– Болжам бойынша, 2050 жылға қарай Каспий теңізінің деңгейі Балтық биіктік жүйесі бойынша –32,4-тен –34 метрге дейін төмендеуі мүмкін, – деп мәлім етті Қазгидромет.
Осы күні Каспий теңізінің қазақстандық бөлігі су деңгейінің төмендеуінен ең көп зардап шегіп отырғанға ұқсайды.
Қазгидромет жүргізген ай сайынғы гидрометеорологиялық шолуға сәйкес, 2025 жылдың қыркүйегінде:
– ең жоғары деңгей Иголкинская банка бекетінде +147 см;
– ең төменгі деңгей Құрық бекетінде –195 см;
– орташа деңгей –118 сантиметр немесе Балтық жүйесі бойынша –29,18 метр болды.
Каспий деңгейінің тарихи өзгеру динамикасы:
1940-1977 жылдары деңгей 1,2 метрге түскен (жылына орта есеппен 4 см);
1978-1995 жылдары 2,5 метрге көтерілген (жылына 13 см);
1996-2023 жылдаы 1,83 метрге төмендеген (жылына 8 см).
2006-2024 жылдары аралығында судың деңгейі тағы 2 метрге азайған.
Былтыр Каспийдің қазақстандық бөлігінде су деңгейі солтүстік-шығыста 22 сантиметрге, ал шығысында 29 сантиметрге төмендегені туралы айтылды.
20 күн бұрын ғана ел Президенті Қасым-Жомарт Тоқаев Каспий теңізінің тартылуына алаңдаушылық білдіріп, түркі елдерін бірлескен іс-қимылға шақырған еді.
