Қасым-Жомарт Тоқаев Азиядағы өзара ықпалдастық және сенім шаралары жөніндегі кеңесті (АӨЫКҚ) дауларды бейбіт жолмен реттеу, қарусыздандыру және бейбітшілік орнату үшін пайдалануды ұсынды.
Бұл туралы Qazaqtoday.info сайты хабарлайды.
– Біздің Ұйым дауларды бейбіт реттеуге, қарусыздандыруға және бейбітшілік орнатуға елеулі үлес қоса алады. Бүгінде бұл айрықша өзекті болып отыр. БҰҰ, ШЫҰ, ТМД және басқа да халықаралық институттармен өзара іс-қимыл жасай отырып, АӨЫКҚ Азиядағы және одан тыс жерлердегі келіспеушіліктерді еңсеруде неғұрлым белсенді рөл атқаруы тиіс. Осыған байланысты қатысушы мемлекеттерді ұжымдық саяси ерік-жігерімізді нақты нәтижелерге әкелетін нақты бастамаларға айналдыруға шақырамыз. Практикалық қадам ретінде Превентивті дипломатия тетігін іске қосуды ұсынамыз. Бейбітшілік орнату дағдарыстардан озып отыруы керек. Дауды болдырмау – өршіп кеткен қарсыластықты реттеуден әлдеқайда тиімді әрі арзан. Мұндай тетік әрбір қатысушы мемлекетке шешім қабылдауға жүйелі түрде қатысу мүмкіндігін қамтамасыз етіп, декларациялардан келісілген іс-қимылдарға көшуге мүмкіндік береді, – деді Қасым-Жомарт Тоқаев.
Мемлекет басшысының айтуынша, болашаққа бағытталған Ұйым бүгінде біз кездестіріп отырған түбегейлі өзгерістерге дайын болуы тиіс.
– Жасанды интеллект, немесе суперинтеллект, экономикалық даму мен ұлттық бәсекеге қабілеттіліктің айқындаушы факторына айналды. Сонымен қатар кибершабуылдар қазіргі дауларда аса қиратушы рөл атқарады. Жасанды интеллекттің бақылаусыз дамуы одан да үлкен алаңдаушылық тудырады, оның мүмкіндіктері халықаралық-құқықтық реттеу тетіктерінен жылдамырақ жетілдірілуде. ЖИ-агенттердің қорғаныс тетіктерін айналып өтіп, сыртқы жүйелерге рұқсатсыз қол жеткізген жағдайлары тіркелді. Егер біз халықаралық-құқықтық құралдарды енгізу арқылы бұл процестерді бірлесіп тоқтатпасақ, мұндай оқиғалар ауыр іркілістерге және мемлекеттер арасындағы шиеленістің өршуіне әкелуі мүмкін. Жасанды интеллекттің дамуы адамзаттың оны тиімді бақылау қабілетінен озып кетпеуі тиіс. Сондықтан сенімді нығайту шаралары цифрлық салаға да таралуы керек. Менің ойымша, АӨЫКҚ-ның қолданыстағы бес өлшемін алтыншысымен – жасанды интеллектпен толықтыру қажет, – деп ұсынды Қазақстан Президенті.
Мақаланы бағалаңыз 👇
Дереккөз: Qazaq Today · Алмас Жарасхан
