Әлеуметтік желіде блогер Уәлиханов көшесіндегі бульвардан бүтін тас төсем алынып, Қаскелеңдегі жеке үйге жеткізілгенін көрсетті , — деп хабарлайды Massaget.kz тілшісі.
Үй иесі плитканы жеке қажетіне сатып алғанын айтқан. Медеу ауданы әкімдігі жағдайға түсініктеме берді.
Әкімдіктің мәліметінше, Шевченкодан Қазыбек биге дейінгі учаскеде абаттандыру жұмыстары жүріп жатыр. Тозығы жеткен тас төсем ауыстырылып, жаңа жарық, автосуару жүйесі, шағын архитектуралық нысандар орнатылуда. Бұл мақсатқа 296 млн теңге бөлінген.
"Уәлиханов көшесіндегі тас төсем 2004 жылы төселген. 2014 жылы тек қоршаулар мен суару жүйесі ішінара жөнделген. Сондықтан плитка 20 жылдан астам қолданылып, толық ауыстыруды қажет етті", – деді әкімдіктегілер.
Ескі төсем өндірістен шыққандықтан, оны толық алмастыру мүмкін болмаған.
"Келісімшартқа сай, алынған материалды кәдеге жарату қарастырылған. Осыған сәйкес, 90 шаршы метр плитка мұқтаж отбасыға берілді, қалғаны мердігердің қоймасына жіберілді", – деп хабарлады әкімдік.
Өзекті жаңалықтарды өз уақытында оқу үшін Facebook парақшамызға жазылыңыз!
