"Ақтау — Түркі әлемінің мәдени астанасы" жобасы аясында ұйымдастырылған "Даламен үндес баба өнер" атты халықаралық қолөнер шеберлерінің фестивалі аяқталды.
Екі күнге созылған фестиваль аясында 11 елдің қолөнер шеберлері мәдени астана жылына арнап текемет басты, деп жазады inbusiness.kz сайты.
– Фестиваль аясында қойдың күзем жүнінен алдын ала сабап негізін және талдырмаларды дайындап алдық. Содан соң барлық түркі жұртының қолөнер шеберлерімен бірлесіп, өнер туындысына әр елдің ұлттық өрнегін көмкердік. Осы өрнектердің ортасына "Ақтау — Түркі әлемінің мәдени астанасы" жобасының логотипін орналастырдық. Біреуіміз бір жағынан өрнегін салсақ, енді біріміз логотиптің детальдарын толықтырдық. Қолдан жасаған ұлттық материал түркі халықтары бірлігінің нышаны іспеттес, – деді Түрікменстан Республикасының дизайнері Айна Дурдылыева.
Іс-шараға 15 шетелдік және 30 қазақстандық шебер қатысты.
– Текемет, киіз тек тұрмыс бұйымы емес, ол – әр ұлттың болмысын, салтын, рухын бойына сіңірген мәңгілік өнер туындысы. Әр өрнек – жүректен шыққан мұра, әр иірім – ұрпаққа арналған аманат. Бүгін басталатын бұл жұмыс – түркі халықтарының бірлігін, бауырластығын, тағылымды тарихын бедерлейтін символдық көрініс, – деді ұйымдастырушылар.
Сондай-ақ, өңір тұрғындары әр ұлттың дәстүрлі қолөнерін тамашалап қана қоймай, туындылардың шығу тарихымен танысты. Фестивальдің жабылу салтанатында отандық және шетелдік дизайнерлердің туындыларынан сән көрсетілімі ұйымдастырылды. Салтанатты шараға ТҮРКСОЙ халықаралық ұйымының Бас хатшысы Сұлтан Раев қатысып, мұндай игі шаралар тығыз ынтымақтастықтың арқасында жүзеге асып жатқандығын айтты.
– Каспий теңізінің жағасында екі күн бойы ерекше мәдени кездесудің куәсі болдық. Дала рухын заманауи үлгімен ұштастырған бұл сән топтамалары тек киім немесе қолөнер бұйымы ғана емес, ортақ болмысымыздың, өткеніміз бен келешегіміздің символына айналды. Біз олардың әрқайсысымен мақтанамыз. ТҮРКСОЙ ұйымы ретінде біз ортақ мәдени мұрамызды дәріптеуді әрі осындай жобаларға қолдау көрсетуді жалғастыра береміз. Әрине, мұндай игі шаралар тығыз ынтымақтастықтың арқасында жүзеге асуда. Баршаңызға шығармашылық табыс тілеймін, алдағы жобаларда да бірлесе жұмыс істеуді жалғастыра беруге ниеттіміз, – деді ТҮРКСОЙ халықаралық ұйымының Бас хатшысы Сұлтан Раев.
Кеш барысында өнер иелеріне ТҮРКСОЙ халықаралық ұйымының Бас хатшысы Сұлтан Раев пен Маңғыстау облысы әкімінің орынбасары Аббат Өрісбаев арнайы марапаттар табыстады.
