Кеше, 28 тамыз Монакода турнирдің негізгі кезеңіне жеребе тарту рәсімі өтті. Алматылық "Қайраттың" Чемпиондар лигасының негізгі кезеңіндегі қарсыластары белгілі болды, — деп хабарлайды Massaget.kz тілшісі.
"Қайраттың" өз алаңындағы ойындары
Алматылықтар үшін басты қарсыластардың бірі — 15 мәрте Чемпиондар лигасын жеңіп алған мадридтік "Реал". Сонымен қатар "галактикостар" Испания чемпионатын 36 рет ұтқан.
Бұдан бөлек, Алматыға "ақ түстерден" бөлек бельгиялық "Брюгге", гректің "Олимпиакосы" және кипрлік "Пафос" келеді. Бұл үш клубты еңсеру мүмкін емес деуге болмайды, сондықтан "Қайраттың" ұпай жинауға толық мүмкіндігі бар.
"Қайраттың" сырт алаңдағы матчтары
Алматылықтар сырт алаңда миландық "Интермен" ойнайды. Айтпақшы, италиялық бұл команда Чемпиондар лигасын 3 рет, ал ұлттық біріншілікті 20 рет жеңіп алған.
Лондонда "Қайрат" жергілікті "Арсеналға" қарсы алаңға шығады. "Канонирлер" Англия чемпионы атағын 13 рет иеленген және 2006 жылғы Чемпиондар лигасының финалисі болған.
Сонымен қатар, "Қайрат" Португалияда — лиссабондық "Спортингпен", ал Данияда — "Копенгагенмен" кездеседі.
Чемпиондар лигасы — жаңа формат
Бұл турнир құрылымы екінші маусым қатарынан қолданылып келеді. Өткен жылғыдай, 36 клуб төрт себетке бөлінеді. Бірінші себетке автоматты түрде тек Чемпиондар лигасының жеңімпазы кіреді, ал қалғандары соңғы бес жылдағы рейтинг бойынша орналастырылады. Жеребе қорытындысы бойынша әр клуб төрт себеттен екі қарсылас алады (өз себетін қоса алғанда). Осылайша, әр команда сегіз ойын өткізеді: төртеуін өз алаңында, төртеуін сыртта. Бір елдің клубтары бұл кезеңде бір-бірімен ойнай алмайды. Сондай-ақ бір елден екіден артық қарсылас түсуіне шектеу қойылған.
Аптаның басты оқиғалары мен пайдалы видеоларды көру үшін YouTube арнамызға жазылыңыз
