Шерзат ісі бойынша апелляциялық сот 18 тамызда өтеді .
Шерзат Полат ісі бойынша сотталғандардың бірі түрмеден шықты. Бұл туралы адвокат Мейірман Шекеев мәлімдеді.
"Марқұм Шерзат ісі бойынша сотталған Думан Ысқақ ауыр қылмыс туралы хабарламағаны үшін бір жыл алты айға сотталған еді. Ол бірінші сатыдағы үкім жазасын өтеп қойғандықтан Алматы облыстық сотының қылмыстық істер жөніндегі сот алқасының судьясы Мұсабекованың 2025 жылғы 23 шілдедегі сот қаулысымен бұлтартпай шарасы жойылып, қамаудан босатылды", – деді адвокат Мейірман Шекеев.
Оның тергеу изоляторында өткізген уақыты есепке алынып, соның негізінде түрмеден босап шыққан.
Адвокаттың айтуынша, Шерзат ісі бойынша апелляциялық сот 18 тамызда өтеді.
Оқи отырыңыз: Шерзат Полат ісі: Сотталғандар марқұмның отбасына 120 млн теңге төлеуге тиіс
Еске салайық, 16 жастағы Шерзат Полат 2024 жылғы 4 қазанда төбелес кезінде алған пышақ жарақатынан қаза болды. Осы оқиға бойынша 11 адам ұсталды. Шамамен бір аптадан кейін Шерзаттың отбасы тұратын Азат ауылындағы үйі өртеніп кетті. Бас прокуратура бұл өрттің қасақана қойылғанын хабарлады. 21 қаңтарда тергеу аяқталды. Оның аясында 40 сот-медициналық сараптама жүргізіліп, 200-ге жуық куәгерден жауап алынды. Қылмыстық істің көлемі – 62 том.
Іске қатысы бар тоғыз азамат сотталған болатын.
