Біріккен Ұлттар Ұйымының Даму бағдарламасы ( БҰҰДБ ) Қазақстандағы «Климатқа төзімді су ресурстарын дамыту» жобасына халықаралық кеңесші ретінде тартылады.
Бұл туралы Су ресурстары және ирригация министрі Нұржан Нұржігітов пен БҰҰДБ-ның Қазақстандағы тұрақты өкілі Катаржина Вавьерняның кездесуінде белгілі болды.
Ислам даму банкі қаржыландыратын жобаның алғашқы кезеңінде төрт жаңа су қоймасын салу, қолданыстағы төрт су қоймасын және 115 каналын қайта жаңғырту көзделген. Шілде айында министрлік пен банк жобаны жүзеге асыруға БҰҰДБ-ны қосу туралы шешім қабылдаған.
Нұржігітовтың айтуынша, БҰҰДБ-ның қатысуы жоба ауқымын кеңейтіп, су ресурстарын басқару жүйесін дамыту тұжырымдамасын толық жүзеге асыруға мүмкіндік береді:
«Жобаны орындау үшін құқықтық база жаңартылды, институттар құрылды, қаржы тартылды. Енді осы істі соңына жеткізу маңызды. Ынтымақтастығымыз қойылған мақсаттарға қол жеткізеді деп сенеміз», – деді министр.
Бұған дейін Ислам даму банкі Астанада су саласындағы жобаларды тиімді іске асыру үшін сатып алу, қаржылық менеджмент, адалдық және этика бойынша арнайы оқыту семинарларын өткізген болатын.
