Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Тәжікстан тарапының шақыруымен жұмыс сапарымен Душанбе қаласына барды. Сапар аясында ол Тәжікстан Республикасының Президенті Эмомали Рахмонның қабылдауында болды, деп хабарлайды Egemen.kz.
Кездесу барысында Эмомали Рахмон екі ел арасындағы қарым-қатынастардың соңғы жылдары жоғары деңгейге жеткенін атап өтіп, Қазақстанмен жан-жақты ынтымақтастықты тереңдетудің, стратегиялық серіктестік пен одақтастықты одан әрі нығайтудың маңызын ерекше атап өтті. Сондай-ақ ол Қазақстан Президентінің өңірлік ықпалдастықты күшейтуге бағытталған бастамаларын жоғары бағалап, қолдайтынын жеткізді.
Өз кезегінде Мұрат Нұртілеу Тәжікстан көшбасшысына Қазақстан Президенті Қасым-Жомарт Тоқаевтың сәлемін және ізгі тілектерін табыстап, мемлекеттер арасындағы жоғары деңгейдегі келісімдердің жүзеге асырылу барысын баяндады.
Әңгіме барысында тараптар Орталық Азиядағы бірлік пен ынтымақтастықты нығайтуға ерекше назар аударды. Көршілес елдермен теңгерімді әрі болжамды қарым-қатынастарды дамыту – өңірлік тұрақтылық пен ортақ мүдделердің кепілі екені атап өтілді.
Кездесудің маңызды нәтижелерінің бірі ретінде Президент Эмомали Рахмон ХХІ ғасырда Орталық Азияны дамытуға бағытталған достық, тату көршілік және ынтымақтастық туралы шартқа қол қойды. Бұл тарихи құжат өңірлік серіктестікті жаңа деңгейге көтеріп, тұрақты даму үшін жаңа кезеңнің басталғанын айқындайды.
Шарттың жүзеге асырылуы өзара тиімді әрі жан-жақты әріптестіктің дамуына тың серпін береді деп күтіледі.
