Әлеуметтік желіде Шопан ата кесенесінде түсірілген бейнежазба қызу талқыланып жатыр. Кадрда әйел адам қатты дауыспен «бата беріп», өзінше діни сөздер айтып отырғаны көрінеді. Бұл сәт көпшіліктің көңілін құлазытып, «шырақшы қайда, мұндай адамдар неге көбейіп кетті?» деген сауал туғызды, деп хабарлайды Skifnews.kz ақпарат порталы.
Пікір қалдырғандардың басым бөлігі мұндай әрекеттерді «шарлатандық» деп бағалап отыр. «Атаға бата бердім дей ме, күлгенім бе, жылағаным ба білмедім», «Осындай балгерлер халықты алдап жүр», «Ата-бабаларды қорлап бітті» деген пікірлер желіні шарлап кетті. Кейбірі «қасиетті жерде айқайлап, жұртты шошытқаны дұрыс емес» деп, бейнежазбадағы әйелге сын айтты.
Дінтанушылар мен сарапшылар да соңғы жылдары ел арасында «шырақшылық», «қасиет дарыған адаммын» деп өзінше уағыз айтатындардың көбейгенін жоққа шығармайды. Мамандардың айтуынша, мұндай құбылыс халықтың сенімін пайдаланып, діни сауатсыздықты тереңдете түседі.
Қазақстанда діни экстремизм мен радикал ағымдардан бөлек, осындай «шарлатандық» та қауіпті құбылысқа айналып отыр. Себебі олар халықтың сенімін пайдаланып, жалған уәде беріп, адамдардың санасын шатастырады. Бұл – рухани мәдениетке де, дәстүрге де, дінге де қайшы.
Дінтанушы Қайрат Жолдыбай:
«Қасиетті жерлерде бата беру – ата-баба дәстүрінде бар. Бірақ оны діни рәсімге айналдырып, айқайлап, жұртты үркіту – әбестік. Мұндай істер Алланың діні емес, адамның өз қиялы. Сондықтан халық сақ болуы керек», – дейді.
Бұл жағдай қоғамда діни сауаттылықтың әлі де төмен екенін көрсетті. Сарапшылардың айтуынша, халық дұрыс ақпаратты тек ресми мешіттер мен құзырлы діни басқармадан алуы тиіс. Әйтпесе әлеуметтік желіде тараған осындай бейнежазбалар қоғамды адастырып, келешекте сенім дағдарысына әкелуі мүмкін.
