Президент елімізде жүргізілген конституциялық реформаның маңызын атап өтті.
Оның айтуынша, өзгерістер мемлекеттік саясаттың жаңа бағытын айқындап, "Әділетті мемлекет" қағидатын іс жүзінде жүзеге асыруға жол ашты, деп жазады inbusiness.kz сайты.
Ата заңда жер мен табиғи ресурстар халық игілігіне тиесілі екені бекітілген. Осы қағидатты орындау үшін бірқатар шаралар қабылданды. Соның бірі – "Ұлттық қор – балаларға" бағдарламасы. Былтырдан бері балалардың есепшоттарына 1,5 миллиард доллардан астам қаржы аударылды. Бұл жас ұрпақтың болашағына деген сенімді күшейтетін маңызды шешім болды.
Соңғы жылдары қабылданған заңдар да азаматтардың құқықтарын қорғауға бағытталды. Адам саудасына қарсы іс-қимыл күшейтіліп, тұрмыстық зорлық-зомбылық пен некеге мәжбүрлеуге қатысты жаза қатаңдатылды. Қылмыстық сот жүйесін ізгілендіруге арналған түзетулер енгізілді. Конституцияның мерейтойына орай қабылданған Рақымшылық туралы заң мемлекеттің адамгершілік құндылықтарға берік екенін көрсетті.
Президент Конституцияның адам құқығының темірқазығы болып қалуы керектігін ерекше атап өтті. Заң үстемдігі мен құқықтық мәдениетті нығайту – әділетті қоғам құрудың басты кепілі. Мемлекет басшысы заңгерлер қауымдастығын Конституция қағидаларын кеңінен түсіндіруге және қоғамда заңды құрметтеу мәдениетін қалыптастыруға шақырды.
