Негізгі бағыттар – Өзбекстан, Қытай және БАӘ.
Кейінгі уақытта сиыр еті бағасының өсуі мен ішкі нарықта тапшылық болуы мүмкін деген алаңдаушылық айтылып жүр. Алайда 2025 жылдың жеті айындағы нақты деректер саладағы тұрақтылықты көрсетіп отыр, деп хабарлайды Ауыл шаруашылығы министрлігі.
Ұлттық статистикаға сәйкес, шілде айының соңында ірі қара мал басы 8,7 миллионға жетті. Оның ішінде сиыр саны – 4,5 миллион (+3,1%), ал бұзау саны 2,7 миллионға дейін өсіп, 17,9%-ға артты. Бұл өндіріс көлемін одан әрі көбейтуге мүмкіндік береді.
"Қаңтар–шілде айларында елде 608,8 мың тонна ет өндірілді (+1,8%), оның ішінде 205,7 мың тоннасы сиыр еті. Бұл көрсеткіш ішкі нарықтағы ұсыныстың жеткілікті екенін дәлелдейді. Сонымен қатар, қаңтар–маусым айларында экспорт көлемі 16,1 мың тоннаға жетіп, 2,4 есеге артқан. Негізгі бағыттар – Өзбекстан, Тәжікстан, Қырғызстан, Қытай және БАӘ. Қазіргі уақытта бордақылау алаңдарының жүктемесі 35–40%-ды құрайды. Бұл көрсеткішті арттыру үшін 1 тамыздан бастап жеңілдетілген несие бағдарламасы іске қосылды. 5% мөлшерлемемен берілетін 12 айлық несиелерге 50 млрд теңге бөлінді. Бұл шара бордақылау алаңдарының жүктемесін 60%-ға дейін жеткізуге мүмкіндік береді", – делінген хабарламада.
Оқи отырыңыз: Картоп, тұз, сиыр еті: мамыр айында әлеуметтік маңызы бар азық-түлік тауарларының бағасы өсті
Сарапшылардың айтуынша, сиыр еті бағасының өсуіне қарамастан, қазіргі деңгей өндірушілер үшін рентабельді болып отыр. Мемлекеттік қолдау ішкі нарықтағы ұсынысты қысқартуға емес, керісінше арттыруға бағытталған.
Осылайша, ет саласы тұрақты дамып, жаңа мүмкіндіктерге жол ашып отыр.
