Еуроодақтың сыртқы істер және қауіпсіздік саясаты жөніндегі жоғары өкілі Кая Каллас АҚШ-тың палестиналық ресми тұлғаларға виза беруге салған тыйымын қайта қарауды талап етті, деп хабарлайды inbusiness.kz сайты Anadolu Ajansı басылымына сілтеме жасап.
Ол бұл шешімнің халықаралық құқыққа және БҰҰ Жарғысында бекітілген қағидаттарға қайшы екенін атап өтті.
Каллас Копенгагенде өткен "Gymnich" бейресми сыртқы істер министрлерінің кездесуі барысында айтты. Дания қазіргі уақытта ЕО-ға төрағалық етуде.
"БҰҰ мен қабылдаушы мемлекет арасындағы қолданыстағы келісімдерді ескере отырып, біз осы шешімді қайта қарауды талап етеміз. Бұл – халықаралық құқық пен БҰҰ-ның іргелі қағидаттарына негізделген әділ талап", – деді ол. Каллас
Еуроодақ елдері бұл мәселе бойынша ортақ мәмілеге келгенін қоса айтты.
Бұған дейін АҚШ Мемлекеттік департаменті қыркүйек айында Нью-Йоркте өтетін БҰҰ Бас Ассамблеясының 80-сессиясына қатысуға тиіс болған палестиналық ресми тұлғалардың визаларын аннулирлағанын жариялады. АҚШ мемлекеттік хатшысы Марко Рубио өз елінің заңдарына сүйене отырып, Палестина азаттық ұйымы мен Палестина әкімшілігі өкілдеріне виза беруден бас тартқан.
Вашингтон палестиналық басшылықты "терроризмді айыптамады, зорлық-зомбылыққа шақырды және Израильге қарсы Халықаралық қылмыстық сот пен БҰҰ Халықаралық сотында "құқықтық соғыс" жүргізіп жатыр" деп айыптады.
Ал Палестина сыртқы істер министрінің саяси кеңесшісі Ахмед эд-Дик "Анадолу" агенттігіне берген сұхбатында АҚШ-тың мұндай шешіміне қатты таңғалғанын айтты. Оның сөзінше, палестиналық ресми тұлғалардың БҰҰ Бас Ассамблеясына қатысуына тосқауыл қою – халықаралық аренадағы әділеттілік пен бейбітшілік қағидаттарына тікелей соққы болып табылады.
