Сауд Арабиясының кәсіпорындары құрма жемісінен сусын әзірлей бастады.
Соның арқасында фермерлердің табысы артты. Қазір олар миллиондаған тонна өнімді ысырап қылмай, өндірушіге жөнелтіп отыр. Бурайда – Саудия астанасы Эр-Риядтан 400 шақырым жердегі шағын ғана шаһар. Зәулім ғимарат, кең сарайы аз. Есесіне елдің байырғы тұрғыны көп. Араб жұртының шынайы қонақжайлығын осында сезінуге болады.
Саудиялықтар үшін жыл сайын жаздың соңы мен күздің алғашқы күндерінде құрма фестивальдері өтіп тұрады. Бурайдадағы бағбандар тойы – солардың ішінде ең ауқымдысы. Артынып-тартынып жүрген туристер де аз емес. Сан алуан өнімді көріп, дәстүрлі кәсіптің қыр-сырына қаныққан олар таң-тамаша.
Әлануд Мұхаммед, Жергілікті құрма өндіруші компания өкілі:
- Компаниямыз осы құрма өнімдерімен фестивальге алғаш рет қатысып отыр. Мақсатымыз – Саудияны әлемге жақсы қырынан таныту. Біз үшін бұл — қастерлі жеміс.
Муат Мансұр, фермер:
- Өндірістік тұрғыда құрма алқаптарының берері мол. Аталған жемістен бал жасап шығардық. Дүкен сөрелерінде көп кездестіресіз.
Дерекке сай, Саудия әлемдік құрма өндірісінде көшбасшы. Миллиондаған түп ағаш маусым сайын тонналап өнім береді. Экспорттық табысы жарты миллиард долларға жуықтаған. Фермерлер бұл кәсіпті заман талабына сай жаңғыртып та келеді. Мәселен, таяуда Мәдина қаласында құрмадан тәтті сусын әзірлейтін кәсіпорын іске қосылды. Құтыдағы өнім әлемнің 17 мемлекетіне экспортталып жатыр.
Ферас Әлноқайдан, Сусын өндіруші компания менеджері:
- Ерекшелігі сол, бұл сусында қанттың мөлшері аз. Еш қоспасы жоқ. Тек жемістің құрамында бар табиғи тәттілер қолданылады. Балаларға зиянсыз десем де болады. Көпшіліктің сұрауы бойынша өзіндік брэндке айналды. Бір жыл бұрын бастаған бизнес қазір өте танымал.
Фестиваль қонақтары қатарында қазақстандықтар да бар. Бірер күн бұрын біздің ел делегациясы іс-шараға арнайы қатысып кетті. Тараптар әріптестік жөнінде әңгіме өрбітіп, сауда-саттық мәселелерін талқылаған.
Корольдікке келген шетелдіктер бұған дейін бұл провинция жайлы көп біле бермейтін. Кейінгі кезде елдің туристік саласы кең қанат жайғалы қала тарихында бетбұрысты кезең басталды. Бір ғана құрма өндірісі пальма ағашына бай мекенге оң имидж қалыптастырып, бюджетке көп кіріс
түсіріп жатыр.
Рауан Мыңбай, 24KZ
