Нұрсұлтан Назарбаев халықаралық әуежайы жоспарлы жөндеу жұмыстарына байланысты ұшу-қону жолағы уақытша жабылады, деп хабарлайды inbusiness.kz сайты.
Әуежайдың ресми ақпаратына сәйкес, жөндеу жұмыстары 2025 жылғы 1–4 қыркүйек аралығында, сондай-ақ 8 қыркүйектен 31 қазанға дейін жүргізіледі. Бұл кезеңдерде ұшу-қону жолағы күн сайын сағат 10:00-ден 18:00-ге дейін жабық болады.
Аталған уақытта әуежайда ұшақтар ұшпайды және қонбайды.
Ал 5–7 қыркүйек күндері ұшу-қону жолағы ашық болады, рейстер әдеттегі кесте бойынша орындалады.
Әуежай әкімшілігі жолаушыларға ұшу кестесіне өзгерістер енгізілуі мүмкін екенін ескертіп, нақты уақытты өз авиакомпанияларынан алдын ала анықтап алуға кеңес берді.
Жөндеу жұмыстары әуежай инфрақұрылымын күтіп ұстау, ұшу қауіпсіздігін қамтамасыз ету және қызмет көрсету сапасын арттыру мақсатында жүргізіліп отыр.
