Алматы қаласының Түрксіб аудандық соты 2019 жылы орын алған Bek Air әуе апатына қатысты қылмыстық істің үкімін түсіндірді, деп хабарлайды Egemen.kz.
Соттың мәліметінше, командир Марат Муратай мен екінші ұшқыш Миржан Мұлдақұловқа қатысты іс қайтыс болғаннан кейін қаралған. Бұл процесс марқұмдардың туыстары істі тоқтатуға қарсы болған соң, Қылмыстық-процестік кодекстің 35-бабына сәйкес жалғасын тапқан.
2019 жылдың 27 желтоқсанында «Алматы – Астана» бағытындағы рейсті орындаған ұшақ әуеге көтерілгеннен кейін көп ұзамай апатқа ұшыраған. Бортта 98 адам болған – 93 жолаушы және 5 экипаж мүшесі.
Апат салдарынан 11 жолаушы мен ұшақ командирі қаза тапты, кейін екінші ұшқыш та көз жұмды. Барлығы 13 адам қайтыс болды. Тағы 53 жолаушы әртүрлі дәрежеде жарақат алған, 21 адам сот-медициналық сараптамадан өтуден бас тартқан.
Сот анықтағандай, апатқа ұшақ қанаттарындағы қар мен мұз қатпалары себеп болған. Бұл ұшақтың көтерілу кезінде басқару қабілетін жоғалтып, әуежай аумағынан тыс жердегі нысандарға соғылуына әкелген.
Тергеу нәтижесі бойынша, пилоттар ұшу алдындағы дайындық кезінде 11 тәртіп бұзушылыққа жол берген. Атап айтқанда, олар әуе кемесін тиісті деңгейде тексермеген, мұз қату белгілерін анықтамаған және қарсы мұздануға қарсы өңдеу жүргізу туралы шешім қабылдамаған.
Сот түсіндірмесінде Bek Air пилоттарының іс-әрекеттері ұшу қауіпсіздігі ережелерін өрескел бұзу деп танылған. Бұл түсіндірме Алматы қалалық сотының Telegram-арнасында 2025 жылғы 5 қарашада жарияланды.
