Бүгінде банктер кейбір қызметтері үшін әртүрлі сомада комиссия ұстайды.
Енді бір банктен екінші банкке ақша аударғанда ұсталатын комиссия құны өсуі мүмкін. Ол қымбаттаса картаны қолданғаны үшін алынатын төлем мөлшері де көтеріледі, деп хабарлады 31 арнаның Информбюро ақпараттық бағдарламасы.
Жалпы келесі жылдан бастап банктердің барлық ақылы қызметтеріне қосымша құн салығы салынбақ. Міне дәл осы жаңашылдық, экономистердің айтуынша, комиссиялардың артуына әкеледі.
Бүгінде банктер кейбір қызметтері үшін әртүрлі сомада комиссия ұстайды. Мысалы, басқа қаржы ұйымындағы шотқа аударым жасағанда, бірі 149 теңге алса, бірі ақшаның мөлшеріне қарай пайызын төлетеді. Тіпті айлық түскенін хабарлағаны үшін комиссия ұстап жатыр. Картасына да теңгеңізді қаласаң да, қаламасаң да алып қояды. Бірақ енді банктер сол әрекеті үшін қаңтардан бастап салық төлейді.
"Қосымша құн салығы барлық қызмет түріне салынбайды. Депозит, несие сияқты төлемдерге қатысты емес. Салық тек комиссиясы бар қызметтерге қолданылады. Бүгінде карта шығару, ақша аудару операцияларын тегін ұсынатын банктер де бар. Олар мысалы құн салығын төлемейді", – деді ҚР қаржыгерлер қауымдастығының бас сарапшысы Рамазан Досов.
Қаржыгердің айтуынша, банктер комиссиясының тарифтерін өзі белгілейді. Мемлекет араласпайды. Сол себепті де салық қосылса, құны көтеріледі дейді экономистер.
"Операциялық шығындардың да өсіп жатқаны белгілі. Мысалы, қазір әртүрлі айти инфрақұрылымдары деп жатыр, қауіпсіздікке байланысты қызметтері, персоналдың да шығындарының көбеюі бар. Бұл да банктердің комиссияларының қымбаттауына әсерін тигізеді", – деді экономист Бауыржан Ысқақ.
Ал халықтың өзі банктердің комиссия алғанына аса қарсы емес. Бірақ қымбаттай берсе, шығыннан айналып өтудің жолын табамыз дейді
