Үкімет инфляциямен күрестің тағы бір тетігін ұсынып жатыр.
Шенеуніктер алма, алмұрт, банан, балық секілді өнімдердің де бағасын бақылауға алуды жоспарлап отыр, деп хабарлады 31 арнаның Информбюро ақпараттық бағдарламасы.
Яғни, халық көп тұтынатын жеміс-жидектер мен ет, сүт өнімдері әлеуметтік маңызы бар тауарлар тізімінде болмақ. Сәйкесінше, сөредегі өнімге қосылған үстемақы 15 пайыздан асып кетсе, кәсіпкер әкімшілік жазаға тартылады. Бірақ, әзірге бөрікті аспанға атып, қуануға тым ерте. Өйткені, тізім қанша тауар түрімен толығатыны белгісіз. Әрі министрлік алдымен бизнес өкілдерінің пікірін тыңдауға тиіс.
Үкімет инфляциямен күрестің тағы бір тетігін ұсынып жатыр. Бұл жолы шенеуніктер азық-түлік құнына әсер етіп отырған тауар бағасын тұсауды көздейді. Яғни, әлеуметтік маңыздағы өнімдер тізбесін кеңейтіп, мемлекеттік бақылауды күшейтпек.
Мәселен, инфляциялық талдау қорытындысына сәйкес, баға өсіміне балық, алмұрт, алма, лимон, банан, шай мен ірімшік секілді 30 тауардың қымбаттауы ықпал еткені нақтыланған. Бірақ, олар әлеуметтік өнім тізбесіне кірмейді.
"Біз қазір бірінші кезекте осы тізімге сиыр етінің тұтас, барлық бөлігін қосуды, оның ішінде тұтас еті бар басқа да бөліктері әлеуметтік маңызды тауарлардың ішіне кіруі қажет деген бастаманы қарастырып жатырмыз. Одан бөлек, көп тұтынатын жылқының еті де сұранысқа ие. Бұл тауар түрі де әлеуметтік маңызы бар тізімге енетін әлеуметті өнім деп айтуға болатын шығар", – деді ҚР сауда және интеграция министрлігінің ресми өкілі Тойгүл Жұбанысова.
Ал, сарапшы Бауыржан Ысқақов әлеуметтік тауарлар тізімінің кеңейтілуі сөзсіз, халық үшін пайдалы – деді.
Бірақ, бағаны реттеу керек екен деп кәсіпті шектеу зиянын тигізуі мүмкін. Сондықтан, өгізді де өлтірмейтін, арбаны да сындырмайтын амал табуды ұсынып отыр.
"Кәсіпорындарға да тиімді қыла аламыз. Егер де мемлекет әлеуметтік осал топтарға бағытталған тауар түрлерін өндіретін кәсіпорындарға қандай да бір қолдаудың тізімін қалыптастырса. Яғни, бұл салада инвестициялық тартымды салаға айналуы керек. Ол мемлекеттік бақылауды қажет ететін, шығынды сұрайтын сала емес", – деді экономист Бауыржан Ысқақов.
Министрлік өкілдері тізімді жаңартуға кемі 1 ай уақыт кететінін айтты. Әрі қызанақ, қияр, ірімшік, тартылған ет секілді кейбір тауар түрлері енбей қалуы да ықтимал. Себебі, халық көп тұтынғанымен, қажетті көлемі болмауы мүмкін. Ал, кәсіпкерлер әлеуметтік маңызы бар азық-түлікке жататын өнім бағасына үстемені 15 пайыздан асырмауы шарт. Талапты бұзды екен, бірден айыппұл арқалайды
