Қазір қос палатада 148 депутат бар.
Мемлекет басшысы Қасым-Жомарт Тоқаев ауыл әкімдерінің диалог-платформасында бір палаталы жаңа Парламент құру бастамасына қатысты пікірін білдірді.
"Мен биылғы Жолдауымда бір палаталы Парламент құру туралы бастама көтердім. Бұл осыған дейінгі саяси өзгерістердің заңды жалғасы деуге болады. Біз "Күшті Президент – ықпалды Парламент – есеп беретін Үкімет" қағидатын орнықтыра түсеміз, яғни еліміз Президенттік Республика болып қала береді. Жаңа бастама қоғамда қызу талқыланып жатыр. Парламенттің құрылымына қатысты көптеген ұсыныс келіп түсуде. Мысалы, депутаттардың саны халық санына сәйкес, яғни пропорционалды болуға тиіс деген ойлар айтылуда. Мұндай ұстаныммен қарайтын болсақ, олардың саны 200 адамға жетеді. Қазір қос палатада 148 депутат бар. Парламенттік реформа – екі палатаны жай біріктіре салу деген сөз емес. Меніңше, депутат санын тым көбейтудің қажеті жоқ", – деді Қасым-Жомарт Тоқаев.
Президент Парламент құрамын керісінше, оңтайландыруды, Парламенттің жұмысын жетілдіруді ұсынды.
"Мысалы, бір палаталы жаңа Парламентте Президент квотасы болмайды. Барлық депутаттар бірдей тәртіппен сайлануы қажет. Бұл – алдағы Парламенттік реформа аясында жасалатын аса маңызды қадам. Мұны жақсы ұғынып, жұртшылыққа кеңінен түсіндіру қажет", – деді Қасым-Жомарт Тоқаев.
Мемлекет басшысы бұл ретте референдум барысында халық жаңа Ата Заңға дауыс беретінін атап өтті.
"Осындай күрделі, жауапты жағдайда елімізде тыныштық, тұрақтылық болуы керек. "Заң мен тәртіп" тұжырымдамасын бәріміз бір қоғам болып сақтауымыз керек. Құқық қорғау органдары өз кәсібилігін көрсетуі қажет. Арандатушыларға немесе "лас, көлеңкелі" саясатпен айналысқысы келетін адамдарға жол бермейміз", – деді мемлекет басшысы.
Оқи отырыңыз: "Жұрт саяси науқандардан мезі бола бастағанын айтуда". Президент аудан әкімін сайлауды саралауды тапсырды
