Сағат 15:00-де Қазақстан Қарулы күштері Ұлттық әскери-патриоттық оркестрінің салтанатты шеруі өтеді.
Отан қорғаушылар күні қарсаңында Астана қаласында ауқымды мерекелік бағдарлама ұйымдастырылады. Іс-шаралар әскери қызметті насихаттауға және патриоттық құндылықтарды нығайтуға бағытталған, деп хабарлайды әкімдіктің баспасөз қызметі.
Әкімдіктің мәліметінше, мерекенің негізгі бөлігі 7 мамыр күні сағат 11:00-де Қазақ елі монументі алаңында өтетін плац-концерттен басталады. Бағдарламада әскери оркестрлердің өнер көрсетуі, саптық дайындық элементтері мен салтанатты бөлімшелердің көрсетілімдері жоспарланған. Оған Қазақстан Республикасы Мемлекеттік күзет қызметі, Қазақстан Республикасы Қорғаныс министрлігі, Қазақстан Республикасы Ішкі істер министрлігі Ұлттық ұланы, Қазақстан Республикасы Ұлттық қауіпсіздік комитетінің Шекара қызметі және Қазақстан Республикасы Төтенше жағдайлар министрлігі өкілдері қатысады.
"Мерекелік шаралар Нұржол желекжолы аумағында жалғасып, сағат 15:00-де Қазақстан Қарулы күштері Ұлттық әскери-патриоттық оркестрінің салтанатты шеруі өтеді. Қала тұрғындары үшін мәдени бағдарлама Астана Арена стадионы аумағында да ұйымдастырылады. Мұнда таңғы сағат 10:00-ден бастап жәрмеңкелер мен балалар аймақтары жұмыс істеп, кешкі 19:00-де эстрада жұлдыздарының қатысуымен концерт өтеді. Сонымен қатар, Әзербайжан Мәмбетов атындағы мемлекеттік драма және комедия театры сахнасында "Тыныштық күзетшісі" спектаклі ұсынылады. Ал Жетісу саябағы мен Оқушылар сарайы Арбаты аумақтарында концерттер мен әскери дефиле өтеді", – делінген хабарламада.
Оқи отырыңыз: Астанада Жеңіс күніне орай соғыс ардагерлері қанша теңгеден алады?
Мерекеге орай елордада ашық есік күндері де ұйымдастырылып, жастарға экскурсиялар, ардагерлермен кездесулер және "Жас сарбаз" қозғалысына қабылдау рәсімдері өткізілді.
Осылайша, Астанадағы мерекелік бағдарлама тек ойын-сауық шараларымен шектелмей, патриотизм, жауапкершілік және ел бірлігі құндылықтарын дәріптейтін маңызды қоғамдық оқиғаға айналмақ.
