Елімізде өндіріс көлемі 6,9%-ға артқан. Бұл ретте негізгі көрсеткішті 6,1%-ға өскен өңдеу саласы қамтыған, деп жазады Egemen.kz.
Өсу драйвері машина жасау саласында 14% жеткен. Оң динамикалар металлургияда (+1,3%), химия өнеркәсібінде (+6%) және құрылыс материалдары өндірісінде (+4,7%) тіркелген.
Сондай-ақ, ірі кәсіпорындармен ұзақмерзімді келісімшарттар мен офтейк-келісімшарттар көлемі 2 есеге өсіп, 147 млрд теңгеден асқан. 16 арнайы экономикалық және 55 индустриялық аймақ түріндегі инфрақұрылым белсенді дамып келеді.
«Арнайы экономикалық және индустриялды аймақтар – жаңа өндірістерді жүзеге асырудың негізгі құралдарының бірі. Аймақтар қажетті инфрақұрылыммен қамтамасыз етілген және жобаларды жүзеге асыру үшін бизнеске табысталады. Өңдеу өнеркәсібіндегі жаңа бастамаларды қолдау үшін шағын өнеркәсіптік аймақтар құру құралы іске қосылды, онда дайын өнеркәсіптік алаңдар жеңілдікті бағамен жалға беріледі. Мұндай аймақтар 8 өңірде салынып жатыр, 90-ға жуық жобаны іске қосып, 3 мыңнан астам жұмыс орнын ашу жоспарланған», деді өнеркәсіп және құрылыс вице-министрі Олжас Сапарбеков.
Биыл өңдеу өнеркәсібінде шамамен 1,5 трлн теңгені құрайтын 190 жобаны жүзеге асыру көзделген. Бұл 23 мың тұрақты жұмыс орнын ашуға мүмкіндік береді.
