Желіде "Дональд Трамптың өлімі" туралы хабарламалар тарап жатыр. #TrumpIsDead хэштегі X (Twitter) желісінде ең көп талқыланған тақырыптардың біріне айналып, ондаған мың жазба жинады. Ресми растаулар жоқ: бұл, бәлкім, АҚШ президентінің денсаулығына қатысты қауесеттер мен оның вице-президенті Джей Ди Вэнстің кейінгі мәлімдемелерінен туған тренд болуы мүмкін, — деп хабарлайды Massaget.kz тілшісі.
Қауесет қайдан шықты?
Талқылаудың күшеюіне Вэнстің USA Today басылымына берген сұхбатындағы сөзі себеп болды. Одан "Қайғылы жағдай болса, президент қызметін атқаруға дайынсыз ба?" деп сұраған. Саясаткер Трамптың "жағдайы жақсы" екенін айтқанымен, "иә, қайғылы оқиғалар болып тұрады, мен дайынмын" деп атап өтті.
Вице-президенттің бұл сөзі президенттің денсаулығы нашар деген ишара ретінде қабылданды.
"Мен президенттің жағдайы жақсы екеніне сенімдімін және ол өз мерзімін аяқтайды деп ойлаймын. Бірақ, Құдай сақтасын, бірдеңе болып кетсе, 200 күндік тәжірибеден артық дайындық жоқ", – деді Джей Ди Вэнс.
Қолының суреті
Сондай-ақ, Трамптың қолындағы көгерген іздер мен аяқғының ісігі байқалатын суреттер де қауесетті күшейтті. Шілдеде Ақ үй президентте қарт адамдарда жиі кездесетін созылмалы веноз жеткіліксіздігі диагнозын растаған еді. Сол кезде баспасөз хатшысы бұл ауру өмірге қауіп төндірмейтінін, ал президент белсенді жұмысын жалғастырып жатқанын айтты.
"Президент Трамп әлемдегі кез келген басқа көшбасшыдан көп адаммен кездесіп, қол алысады. Оның қызметке адалдығына ешкім күмән келтіре алмайды", – деді Ақ үйдің баспасөз хатшысы Каролайн Левитт.
"Симпсондар" және мемдер
Қауесетті күшейткен тағы бір фактор – "Симпсондар" мультсериалының авторы Мэтт Грейнингтің Comic-Con шарасындағы әзілі. Ол шоу "біреу қайтыс болғанша жалғаса береді" деп қалжыңдап:
"Кімнің қайтыс болатынын білгенде, көшелерде би болады. Бірақ президент Вэнс оны тоқтатады", – деді.
Әзіл әлеуметтік желілерде дереу тарап кетті, себебі сериалдың "болашақты болжайтыны" жайлы беделі бар.
Бұған қоса, желіде Ақ үйдің алдында жүрген "жедел жәрдем көліктері" түсірілген видеолар мен "Симпсондардың Трамптың өлімі туралы болжамы" деген жалған жазбалар да тарап кетті. Барлығы фейк пен әзіл-мем болып шықты.
Техникалық ақаулар мен үнсіздік
Қауесетті Ақ үй сайтындағы ақау да күшейтті: трансляция "жақында ораламыз" деген жазумен тоқтап қалды. Пайдаланушылар мұны төтенше жағдайдың белгісі деп ойлады, бірақ бұл қарапайым техникалық үзіліс болып шықты.
Ал Трамп екі күн қатарынан жұрт алдына шықпай, әлеуметтік желіде белсенділік танытпағандықтан, сөз көбейді. Кейінірек ол тарифтерге қатысты сот шешімін Truth Social парақшасында талқылап, қауесетті жанама түрде жоққа шығарды.
Қорытынды
Қазір Дональд Трамптың өлімі туралы ақпаратқа ешқандай ресми дәлел жоқ. Барлық хабарлама – қауесет пен интернет-мемдер ғана. Ақ үй мен президенттің өзі мұндай жалған ақпараттарды бірнеше рет жоққа шығарған. Жақын уақытта Трамп көпшілік алдына шығып, мәлімдеме жасайды деп күтіледі.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
