Қыркүйекте Астанада Әлемдік және дәстүрлі діндер көшбасшыларының съезі өтеді , деп хабарлайды 24kz.
Әлем асыға күтіп отырған алқалы жиынға Түркиядан да делегация қатысады. ТҮРКСОЙ ұйымының бас хатшысы Сұлтан Раев Анкарада біздің арнаға сұхбат беріп, құрылтайдың әлемдік деңгейдегі маңызына тоқталды.
Әсия Нұрлыбаева, тілші:
- Әлемде геосаяси ахуал күрделене түскен тұста діннің қоғамдағы маңызы артты. Дін – сенім ғана емес, ұлтты ұйыстырып, әлеуметтік тұрақтылық пен бейбітшілікті нығайтатын құндылыққа айналды. Сол себепті Астанада өтетін әлемдік және дәстүрлі діндер көшбасшыларының съезі диалог пен сенімге құрылған бірегей алаң деуге негіз бар. «Өйткені кейінгі он жылда Астана жаһандық мәселелер талқыланатын маңызды алаңға айналды», — дейді ТҮРКСОЙ ұйымының бас хатшысы Сұлтан Раев.
Сұлтан Раев, халықаралық ТҮРКСОЙ ұйымының бас хатшысы:
- Астанада ЕҚЫҰ-ның басқосулары өтті, бірқатар маңызды саммиттер ұйымдастырылды. Ал дін тақырыбындағы ауқымды форумдар тек осында тұрақты түрде өтіп келеді. Басқа мемлекеттерде дәл мұндай идея мен алаң жоқ деуге болады. Бұл құрылтайдың ерекшелігі – әлемдегі барлық дін өкілдерін бір үстел басына жинауы. Жер бетінде қанша дін болса, сонша өкілі мен жетекшісі қатысады.
Ұйым басшысының айтуынша, хакім Абайдың «Адамзаттың бәрін сүй бауырым деп» деген ұстанымы – қазіргі қоғамға аса қажет гуманистік бағдар. Бұл қоғамды ала-құла әңгімеден арашалап, адамды тілі, діні, нәсіліне бөлмей құрметтеуге үгіттейді. «Съездің көксегені де осы: адамгершілікті сақтап, бейбітшілікті нығайту, жер бетіндегі тыныштықты қорғау», — дейді ол.
Сұлтан Раев, халықаралық ТҮРКСОЙ ұйымының бас хатшысы:
- Астанадағы форумның негізгі идеясы – Абайдың адамзатқа ортақ ойларын қайта жаңғырту. Ол адамды сүю, адамды қорғау, адагершілікті сақтау сияқты құнды қағидаларды дәріптейді. Өйткені адам – жер бетіндегі ең маңызды құндылық. Осы тұрғыдан алғанда құрылтайдың тарихи маңызы зор.
Түркі әлемі мен ислам өркениетінде айрықша рөлге ие Түркия бұл жиынға белсене араласып келеді. Ауқымды шараға Анкараның қатысуы форум беделін нығайтып, өңірлік ынтымақтастыққа жаңа серпін берері сөзсіз.
Авторы: Әсия Нұрлыбаева
