Қазақстан мен Қытай ынтымақтастығы нығайып келеді. Екі ел сауда-саттық, логистика саласын дамытумен қатар бірлесе өндіріс орындарын салып жатыр, деп хабарлайды 24kz.
Солардың бірі – Жаркент қаласында ашылған жүгері өңдеу зауыты.
Шыңғыс Қалиден, тілші:
- Қос елдің кәсіпкерлері бірлесе салған зауытта күніне 120 тонна жүгері өңделеді. Кептіріліп, тартылған дақыл бастапқыда қаптарға салынып сатылса, кейін түйіршіктеліп құс, балық және мал азығы ретінде шетелге экспортталады.
Ербол Ормекеев, кәсіпкер:
- Қытай, екіншісі Өзбекстан, үшіншісі Иран мемлекеті. Соған жем ретінде. Бидай, жүгері бәрі бізде бар. 40 Камаз жібергенше соның бәрін престеп, 4 камаз жіберген жақсы. Сондай мақсаттарымыз бар. Келешекте. Биыл бастаймыз, бұйырса.
Зауыттағылар биыл 100 мың тонна жүгері қабылдауды жоспарлап отыр. Аталған дақылды шекаралы аймақтағы 5 мыңнан аса шаруа өсіреді.
Дәулеткелді Наймантаев, Талды ауылының тұрғыны:
- Жүгері деген өте тиімді өте өнімді береді. Өзінің тиімділігі жағынан басқа дақылдарға қарағанда өте жоғары. Өйткені жүгеріден әрбір тоннаға 120-150 тоннаға дейін әрбір гектардан алуға болады. Бидай болсын, басқа болсын ондай бермейді. Сондықтан осындайлар көбейетін болса, ауданымыздың экономикасының негізгі көзі жүгері әлі де дами береді.
Бірлесе қолға алынған жобалардың ең ауқымдысы – құрғақ порт. Онда жылына 540 мың контейнер тиеп түсіріледі. Сонымен қатар күн және жел электр станциялары шығарылады.
Серік Сәбитайұлы, кәсіпкерлік басқармасының басшысы:
- Қазіргі таңға 25 жобаның 15 бірлескен жобасы іске қосылған. Инвестиция 80 млрд теңгені құрап, 200-ден астам адам жұмыспен қамтылған. Осының ішіндегі 90%-і Қазақстан азаматтары.
Аймақта қытайлық инвесторлардың қолдауымен туризм, ауыл шаруашылығы және жаңартылатын энергия өндіруге қатысты тағы 10 кәсіпорын ашу жоспарланған. Жоба жүзеге асқанда 400 млрд-қа жуық теңге тартылып, 3200 адам тұрақты жұмыспен қамтылады.
Авторлары: Шыңғыс Қалиден, Жеңіс Әбдірешов
