Елімізде көмір өндіру көлемі жылдан жылға артып келеді. Ал кеншілер — индустриялық дамудың негізгі локомативі. Қауіпті жұмысты қалыпты өміріне айналдырған кеншілердің ертең кәсіби мейрамы атап өтілмек. Мереке қарсанында әріптесім Жандос Бақытұлы сала саңлақтарымен тілдесіп қайтты.
Абай ауданының тұрғыны Николай Дудкин ғасырға таяу ғұмырының тең жартысын көмір саласына арнаған. Небәрі 19 жасында Қазақстанға келіп, Қарағандыдағы Киров шахтасында еңбек жолын бастапты. Өмірлік жарын да осы кеніште жолықтырып, кеншілер әулетінің қазығын қайламен қаққан.
Николай Дудкин, ардагер кенші:
Бұл кәсіби мейрамды 77 жыл бұрын басталған ең бірінші Кеншілер күнінен бастап тойлап келемін. Қарапайым жұмысшыдан бастап барлық лауазымда жұмыс істеп көрдім. Бұл мамандыққа екінің бірі шыдай бермейді. Білегінде кеші, жүрегінде рухы барлар ғана соңына дейін барады.
Құрыш білекті кейіпкеріміздің білімі де терең. 15 жыл бойы өзі қызмет еткен Абай шахтасын басқарған. Сол жылдары қауіпсіздікті арттыру мақсатында жаңа технологияларды да енгізген көрінеді. Ол еңбегі үшін Техника ғылымдарының докторы атанған.
Николай Дудкин, ардагер кенші:
Қарағанды көмір бассейіні өте бай. Сондықтан осы салаға көңіл бөлу керек. Тағы да көмір шахталарын ашып, жұмысты күшейту керек. Әлемдік тәжірбиелерге сүйеніп, қауіпсіздікті барынша қолға алса деймін. Ең бастысы осы.
93 жастағы Николай Дудкиннің 4 ұлы да әке жолын қуған. Бүгінде барлығы зейнетте. Үлкен ұлы әкесі басқарған кеніште 30 жыл еңбек етіп, 2018-2021 жылдары басшылық еткен.
Сергей Дудкин, Николай Дудкиннің ұлы:
Әкем бар ғұмырын шахтаға арнаған адам. Біз де ойланбастан осы жолды таңдадық. Бір қызығы 1992 жылы оқу бітіріп, еңбек жолымды бастағанымда, әкем зейнетке шықты. Нағыз ұрпақ сабақтастығы осы шығар.
Елімізде көмірден тек жылу ғана емес электр қуаты да өндіріледі. Жеті қат жер астынан шығатын әрбір қара алтында маңдай тердің табы бар. Қайласы қайыспаған қара нарлардың еңбегі бүгінгі күннің жарығы, әр шаңырақтың жылуы.
Жандос Бақытұлы
