2025 жылдың 9 шілдесінде Астанада Перизат Қайрат пен оның анасы Ғайни Алашбаеваның ісі бойынша алдын ала тыңдау өтіп жатыр, деп хабарлайды Zakon.kz.
Астана қаласының Қылмыстық істер жөніндегі ауданаралық сотының судьясы Сабыржан Кәрімов сотталушы Қайраттың сотты жабық өткізу туралы өтінішін қарады. Ол өтінішті ішінара қанағаттандыру туралы шешім шығарды.
"Басты сот талқылауы жалпы тәртіппен ашық сот отырысында 2025 жылғы 14 шілдеде сағат 10.00-ге белгіленсін. Сотталушылардан жауап алу, олардың бүкіл сот талқылауы барысында түсініктеме беру, сондай-ақ құпия ақпаратты және банк құпиясын құрайтын материалдарды зерттеу кезінде сот талқылауының жариялылығы шектелсін", – деді Сабыржан Кәрімов.
Судья сотталушы Қайратқа қатысты қамауға алу түріндегі бұлтартпау шарасын, сондай-ақ сотталушы Алашбаеваға қатысты істі сотта қарау мерзіміне үйқамаққа алу түріндегі бұлтартпау шарасын сақтап, ұзартты.
"Қазақстанның Израильмен және Палестинамен халықаралық қатынастарына әсер етуі мүмкін мән-жайлар туралы өтінішке келсек. Айыптау актісіне сәйкес, мемлекеттер арасындағы әскери қақтығыстың мән-жайы көрсетілмеген, бұл бөлімде Қайратқа айып тағылмаған, ал сот істі тек айыптау қорытындысы аясында қарап жатыр.Осылайша, сот талқылауының жариялылығы жариялылық қағидаттарын сақтай отырып, заңмен қорғалатын мүдделерді қорғауға қажетті көлемде ғана шектеледі", – деп атап өтті судья.
Ол қылмыстық іс аптаның әр дүйсенбі және сейсенбі күндері сағат 10:00-ден жұмыс күні аяқталғанға дейін қаралатынын түйіндеді.
Айыпталушылардың сотқа журналистердің қатысуына, сондай-ақ фото және бейне жазбаға қарсы сөйлегені бұрын хабарланған болатын.
2025 жылдың 30 маусымында Бас прокуратура Перизат Қайрат пен Ғайни Алашбаеваға қатысты қылмыстық істі мәні бойынша қарау үшін Астана қаласының қылмыстық істер жөніндегі ауданаралық сотына жібергенін хабарлады.
Қызы мен анасы мүгедек балаларға, сондай-ақ Қазақстандағы су тасқыны мен Таяу Шығыстағы қақтығыстардан зардап шеккендерге қайырымдылық көмек көрсету сылтауымен Қазақстан Республикасының азаматтары мен ұйымдарынан жиналған 3 миллиард теңгеден астам қаржыны жымқырды деп айыпталуда. Перизат Қайрат "Biz Birgemiz Qazaqstan 2030" ҮЕҰ-ға түскен қаражатты өзінің жеке шотына және анасына аударған.
2024 жылдың 14 қарашасында ҚМА волонтёр белсендісі және қоғамдық қайырымдылық қорының негізін қалаушы Перизат Қайратқа қатысты тергеу жүргізіп жатқаны белгілі болды. 2025 жылдың 21 ақпанында ҚМА Перизат Қайратқа қатысты жаңа істің жай-жапсарын ашты.
Сәуірдің 3-і күні Қаржы мониторингі агенттігі төрағасының орынбасары Жеңіс Елемесов қылмыстық іс бойынша тергеудің аяқталғанын хабарлады. Оның айтуынша, Перизат Қайрат кінәсін мойындамайды. 4 сәуірде AFM іс туралы жаңа мәліметтерді ашты.
