Курорттық аймақтарға жүргізілген инспекция нәтижесі бойынша шаралар қабылданып, бірқатар лауазымды тұлғалар жауапкершілікке тартылған. Бұл туралы үкіметтің ресми сайтына сілтеме жасаған KAZ.NUR.KZ.
Үкіметтің баспасөз қызметінің мәліметінше, мемлекет басшысының туристік сала мәселелері жөніндегі тапсырмасына сәйкес, премьер-министрдің орынбасары Ермек Көшербаевтың басшылығымен ведомствоаралық жұмыс тобы құрылды.
Оның құрамына туризм және спорт, көлік, ішкі істер, экология және табиғи ресурстар, су ресурстары және ирригация, денсаулық сақтау министрліктерінің және басқа да уәкілетті мемлекеттік органдардың басшылары кірген.
10-12 шілдеде Алматы, Қарағанды, Жетісу және Абай облыстарына инспекциялық сапар барысында бірқатар жүйелі заң бұзушылық анықталған.
Жұмыс тобының мүшелері туристермен кездесулер өткізіп, Қапшағай су қоймасындағы, Алакөл және Балқаш көлдеріндегі инфрақұрылыммен танысқан. Азаматтардың туристік инфрақұрылымның жай-күйіне, сервистің жеткіліксіз деңгейіне және қажетті қауіпсіздік шараларының болмауына қатысты хабарламалары расталған.
Әсіресе, жергілікті атқарушы органдар басқаратын коммуналдық жағажайлардың жағдайы ерекше алаңдаушылық туғызған. Онда абаттандыру нормаларын бұзу, чек бермей жұмыс істейтін бизнес субъектілерінде кассалық тәртіптің болмауы, сондай-ақ санитариялық талаптар мен қауіпсіздік нормаларын елемеу фактілері тіркелген.
Инспекция қорытындысы бойынша жауапты лауазымды тұлғаларға қатысты тәртіптік жаза қолданылған:
- туризмді дамытуға жауапты туризм және спорт вице-министріне, сондай-ақ Алматы, Қарағанды, Абай және Жетісу облыстары әкімдерінің орынбасарларына қатаң сөгіс жарияланған;
- Қонаев, Балқаш қалаларының, Алакөл, Мақаншы аудандарының әкімдеріне, сондай-ақ ауылдық округтердің әкімдеріне сөгіс жарияланған;
- кәсіпкерлікке, туризмге, қоршаған ортаны қорғауға, сәулет пен саудаға жауапты облыстық басқармалардың басшыларына жазалау шаралары қолданылған;
- экология және табиғи ресурстар, денсаулық сақтау, қаржы, су ресурстары және ирригация, сауда және интеграция, көлік министрліктерінің аумақтық бөлімшелерінің басшылары жауапкершілікке тартылған.
"Жергілікті жерлерде орталық мемлекеттік органдар өкілдерінің қатысуымен көшпелі тексерулер жүргізілуде. Тексеру қорытындысы бойынша туристік инфрақұрылымды дамытудың Жол картасы әзірленетін болады, онда саладағы жүйелік проблемаларды жою жөніндегі бірінші кезектегі шаралар айқындалады", — делінген хабарламада.
Бұдан бөлек, жұмыс тобының базасында туристік қызметтердің сапасын арттыру, курорттық аймақтарды абаттандыру және жергілікті жерлерде құқықтық тәртіпті қамтамасыз ету жөніндегі жұмысты тұрақты негізде үйлестіретін Жобалық кеңсе жасақталған.
Мәтіннен қате тапсаңыз, бізге жазыңыз
