Елордаға LRT-ның алғашқы жылжымалы құрамы жеткізілді. Құрамдар арнайы жабдықталған автотралдармен әкелінді. Олардың әрқайсысы төрт вагоннан тұрады, деп хабарлайды Астана әкімдігіне сілтеме жасаған KAZ.NUR.KZ.
Вагондар Қытайдың Таншань қаласында шығарылған. Автокөлікпен жеткізу Қытай мен Қазақстан аумақтары арқылы өтетін, ұзындығы 5 300 км-ден асатын маршрут бойынша жүзеге асырылған және 10 күнге созылған.
Автотрал платформаларына секцияларды тиеу тікелей өндіруші зауыттағы крандардың көмегімен жүзеге асырылған. Маршруттың барлық кезеңінде жүктердің бекітілуі мен қатаң қауіпсіздік шаралары қамтамасыз етілген.
Ұзындығы 60 метрлік жылжымалы құрамдар GOA 4 деңгейіндегі автоматтандырылған бағдарламалық-аппараттық кешенмен жабдықталған, ол келесі функцияларды қамтамасыз етеді: есіктердің автоматты түрде ашылып-жабылуы, тоқтау және жылдамдату, депоға кіру және шығу, құрамдардың жағдайын бақылау, сондай-ақ пойыздар арасындағы қашықтықты қадағалау.
Құрамдар толықтай автоматтандырылған, басқару жүйесі жүргізушісіз жүзеге асырылады және операторлар тарапынан үнемі бақылауда болады.
Аталған құрамдарды өндіру барысында заманауи, жеңіл және берік материалдар қолданылды. Бұл шешім жолаушыларға қолайлы динамикалық сипаттамалар мен жоғары деңгейдегі акустикалық жайлылықты қамтамасыз етуге бағытталған.
Құрамдардың жалпы техникалық параметрлері:
- Ұзындығы – 59,97 м, ені – 2,8 м, биіктігі – 3,8 м;
- Қуат көзі түрі: үшінші рельс, 750 В;
- Сыйымдылығы: 600-ден астам жолаушы;
- Ең жоғары жылдамдығы: 80 км/сағ;
- Орташа пайдалану жылдамдығы: 39,5 км/сағ;
- Салмағы: 94 т (жолаушыларсыз).
"Вагондарды сатып алу және тасымалдау EPC-келісімшарт шеңберінде жүзеге асырылады, яғни жеке бюджеттік қаржыландыру бөлінбейді", — делінген хабарламада.
