«Дарындыға – дарқан жол» жобасы аясында облыс әкімінің қатысуымен өткен кездесуде халықаралық және республикалық олимпиадалардың, зияткерлік жарыстардың, шығармашылық байқаулардың, чемпионаттардың 61 жеңімпазы мен жүлдегері бас қосты.
Облыс әкімі Берік Уәли кездесу алдында оқушылардың жобалары мен жетістіктері ұсынылған көрмені тамашалады. Көрмеде «Роботтехника» бағытында колледждер мен мектептердің үздік ғылыми жобалары, сондай-ақ Х халықаралық әскери-патриоттық «Айбын» жастар жиынының жүлдегерлері, дарынды балаларға арналған Ш.Уәлиханов атындағы «Жас ұлан» арнайы ерлер мектеп-лицейі оқушыларының жетістіктері ұсынылды.
Еркін форматта өткен кездесуде Абай облысының дарынды оқушылары жетістіктері мен алдағы мақсаттары туралы айтып, ойлары мен ұсыныстарын ортаға салды. Өңір басшысы сөз сөйлеген әрбір қатысушыны мұқият тыңдап, ұсыныстарға жауап берді.
«Бүгін мен сендерге алдыңғы буынның шын пейілін айтқым келеді: сендер – біздің өңірдің ең үлкен үміті, ең үлкен сенімісіңдер. Біз сендермен мақтанамыз. Бұл залда талантымен де, еңбегімен де биікке көтерілген жас көшбасшылар отыр. Мемлекет басшысы Қасым-Жомарт Тоқаев: «Елімізде жүзеге асырылып жатқан әрбір бастама, ең алдымен, сіздерге арналады. Қазіргі реформалардың игілігін көретін де, елдік істерді жалғастыратын да – сіздер» деген еді. Сендер олимпиадаларда, жобаларда, жарыстарда жеңіске жетіп қана қоймай, жаңа идеяларға жол ашып, үлкен жауапкершілікті арқалап жүрсіңдер. Біз бүгін ресми жиынға емес, шынайы әңгімелесуге жиналдық. Ойларың, сұрақтарың, ұсыныстарың – бізге маңызды. Өйткені талантты жастарға өз әлеуетін туған жерінде жүзеге асыруға жағдай жасау – барлығымыздың ортақ міндетіміз. Осы орайда биылғы оқу жылының соңында халықаралық олимпиаданың жүлдегерлеріне, яғни 18 оқушыға облыс әкімінің атынан қомақты сомадағы стипендия тағайындалатынын да қуанышпен хабарлағым келеді. Бұл білімге құштар, талапты жастарға үлкен мотивация болары сөзсіз», деді облыс басшысы.
Жиынға қатысқан оқушыларға облыс әкімінің атынан ақшалай сертификаттар табысталды. Мәселен, биыл Абай облысының оқушылары халықаралық және республикалық олимпиадалар мен байқауларда 277 медаль жеңіп алған еді. Олардың қатарында халықаралық математика және информатика пәндерінен Әл-Хорезми олимпиадасы, жасөспірімдер арасындағы халықаралық жаратылыстану-ғылыми олимпиадасы (IJSO), математика, информатика, физика және химия пәндері бойынша «Туймаада» халықаралық олимпиадасы, Ө.Жолдасбеков атындағы математика және механика бойынша зерттеу жобаларының халықаралық конкурсы, сондай-ақ халықаралық әскери-патриоттық «Айбын» жастар жиыны бар.
Абай облысы
