"Қайраттың" "Селтик" командасынан басым түсетінін дәл болжаған Алматы хайуанаттар бағындағы Ару есімді піл желі жұлдызына айналды, деп хабарлайды 24KZ.
Телеарна тілшісінің хабарлауынша, "Қайрат" — "Селтик" матчының алдында хайуанттар бағының қызметкерлері пілге екі футбол командасының аты жазылған жемі-жидекке толы шелек ұсынған. Мұны төрт рет жасап көрген. Соның бәрінде Ару "Қайратты" таңдаған.
"Арудікі тура келді, "Қайрат" жеңді", — дейді хайуанаттар бағының қызметкері Бек Беркімбеков.
"Қайраттың" жеңісін дәл болжағаннан кейін оны көргісі келетіндер саны бұрынғыдан арта түскен.
Хайуанаттар бағы тұяқты малдар бөлімінің меңгерушісі Балабек Махатовтың айтуынша, Арудың футболға қатысты бұл алғашқы болжамы емес. Қызметкерлер оның мұндай қабілетін бұған дейін де байқапты.
"2022 жылғы әлем чемпионатының финалында Аргентина мен Франция құрмалары кездескенде Аргентинаның жеңетінін сезген. Бұл жолы да тура тапты деп айтуға болады. "Қайратты" көрсетті", — дейді Балабек Махатов.
Айта кетейік, соңғы жылдары ірі футбол турнирлерінде жануарларға жорамал жасату сәнге айналды. Мысалы, 2010 жылы сегізаяқ Пауль Испанияның әлем чемпионы болатынын дөп тапқан. Паульден кейін Ахилл атты мысық, Нелли дейтін піл мен Фунтик есімді жабайы шошқа пайда болды.
Ал Ару биыл 27-ге толған. Хайуанаттар бағында Ару жалғыз емес. Қасында Лао есімді тағы бір азиялық піл бар. Екеуін де Лаостан әкелген. Мұнда келгеніне биыл ширек ғасыр болған.
Мәтіннен қате тапсаңыз, бізге жазыңыз
