Елімізде 2027 жылы жалпыұлттық референдум өтеуі мүмкін. Бұл туралы мемлекет басшысы Қазақстан халқына жолдауында айтты, деп хабарлайды Ақордаға сілтеме жасаған KAZ.NUR.KZ.
Айта кетейік, бұған дейін президент Қазақстанда бір палаталы парламент құру туралы бастама көтергенін жазған едік.
Қасым-Жомарт Тоқаев бұл өте маңызды мәселе екенін, оны асығыс жүзеге асыруға болмайтынын жеткізді.
"Бұл реформа азаматтық секторда, сарапшылар ортасында, сондай-ақ, әрине, қазіргі парламентте жан-жақты талқылануы қажет. Реформаның мән-маңызы айрықша екенін ескерсек, оны талқылауға бір жыл уақыт керек деп ойлаймын.
Содан кейін, яғни, 2027 жылы жалпыұлттық референдум өткізуге болар еді. Содан соң Конституцияға тиісті өзгеріс енгізе аламыз.
Мен мемлекеттің тағдырын айқындайтын барлық мәселе халықтың келісімімен ғана шешіледі деп бұған дейін бірнеше рет айттым. Егер бір палаталы парламент құру қажет деген ортақ шешімге келсек, ондай парламентті тек қана партиялық тізім бойынша сайлаған жөн деп санаймын", — деді мемлекет басшысы.
Президент осы орайда мәжілістің қазіргі құрамы барлық заңдық рәсім аяқталғанша өз ісімен айналыса беретініне баса назар аударды.
"Сенат жалпыұлттық референдумның қорытындысы шығып, жаңа парламент сайлауы өткенге дейін алаңсыз жұмыс істейді. Ал саяси партиялардың бәсекелі тартысқа дайындалуына уақыты болады.
Депутаттарымыз нағыз мемлекетшіл азамат ретінде бұл мәселеге зор жауапкершілікпен әрі түсіністікпен қарайды деп ойлаймын. Түптеп келгенде, саяси реформалардың бәрі еліміздің біртұтас институционалды жүйесінің ажырамас бөлігіне айналады", — дейді ол.
Қасым-Жомарт Тоқаев реформа жасау қажеттігі туралы не үшін ерте жариялап жатқанын түсіндірді.
"Әрине заңды сұрақ туындауы мүмкін: президент парламенттік реформа жасау қажеттігі туралы неге соншалықты ерте жариялап жатыр, әйтпесе, саяси технологияның қағидасына сәйкес мұндай шаралар тосыннан, күтпеген жерден жасалады емес пе?
Бірақ мен осыған дейін де айттым, тағы да қайталап айтамын: мен еліміздің және халқымыздың тағдырына қатысты қандай да бір мәселеге келгенде тек қана ашық саясат жүргізу керек деп санаймын, мұндай ауқымды реформаны қоғамнан құпия ұстауға болмайды деп есептеймін.
Осындай тағдырлы мәселелер бойынша халықпен ашық сұхбат жүргізу қажет деп сенемін. Сонда ғана бәріміз бір ел болып, әділетті және қуатты Қазақстанды құру жолында тағы бір маңызды қадам жасаймыз", — дейді президент.
Мәтіннен қате тапсаңыз, бізге жазыңыз
