Ақмола облысында бірнеше адам қысқа уақыт ішінде интернет-алаяқтардың құрбанына айналды, деп хабарлайды Zakon.kz аймақтық полиция департаментінің баспасөз қызметіне сілтеме жасап.
Полицияның мәліметінше, 8 қазанда Бұланды ауданының тұрғыны әлеуметтік желі TikTok арқылы "капиталды көбейтеміз" деген уәде берген белгісіз тұлғаларға сеніп, 3 млн 187 мың теңгесінен айырылған.
Сол күні Көкшетау қаласының полициясына тағы бір тұрғын жүгінген. Оның айтуынша, 7 қазанда күйеуіне өзін "Қазпошта" мен Халық банкінің қызметкерлері ретінде таныстырған алаяқтар хабарласып, 5 млн 322 мың теңге иемденген.
Бұған ұқсас жағдай Шортанды ауданында да тіркелді: тұрғын OLX платформасында контейнер сатып алмақ болып, 87 мың теңгесін бейтаныс адамдарға аударып жіберген.
Барлық фактілер бойынша сотқа дейінгі тергеу басталды.
Полиция азаматтарға сақ болуды ескертеді:
"Жеңіл табыс немесе капиталды арттыру туралы ұсыныстарға сенбеңіздер. Ешкімге жеке деректеріңізді, банк картасының реквизиттерін және растау кодтарын бермеңіздер. Тексерілмеген сайттар мен күмәнді сілтемелерге кірмеңіздер", – делінген хабарламада.
Айта кетейік, бұған дейін қазақстандықтарға жалған айыппұл туралы хабарламалар мен фишингтік сайттар жөнінде ескерту жасалған болатын.
