Теміржол рельстер мен шпалдар ғана емес. Бұл үнемі назар аударуды және дәлдікті қажет ететін күрделі ағза іспеттес. Жолаушылар уақытында діттеген жеріне жетеді, пойыздар кестеден кешікпейді, ал тапсырыс беруші жүкті дер кезінде алады. Мұның бәрі кәсіби мамандардың мінсіз қызметінің арқасында жүзеге асады. Шілденің шіліңгір ыстығында да, қыстың сақылдаған сары аязында да жолшылар жұмыстан қалмайды. Рельстің бойын мұқият тексеріп шығады. Егер жол бойынан ақау шықса, әуелі монтерлер іске кіріседі. Олар әр рельстің ерекшелігін біледі. Тізе қосып, бірге әрекет ете алатын команда шеберлік пен тәжірибесін ұштастырғанда кез келген қиын істің түйіні оңай тарқатылады. Инженерлер, диспетчерлер, электр механиктері, машинист пен қызмет көрсету бригадасы секілді көптеген маман өз ісіне тиянақты болғанның нәтижесінде теміржол саласы өркендеп келеді.
