Сербияда үшінші күн қатарынан президент Александр Вучичтің жақтастары мен қарсыластарының қақтығыстары жалғасып жатыр. Валево қаласында (Белградтан 100 шақырым қашықтықта) наразылар полициямен қақтығысып, Серб прогрессивті партиясының кеңсесін от қоюға тырысты. Тәртіп сақшылары көз жасаурататын газ қолданып, 18 адамды ұстады . Бір полицей жараланғаны хабарланды, деп жазады Egemen.kz.
Белградта да жағдай шиеленісті. Наразылар қоқыс жәшіктерін өртеп, полицияға тас пен бөтелке лақтырды. Полиция газ қолданды, бірақ зардап шеккендер жайлы мәлімет әлі берілген жоқ.
Бұған дейінгі күндері 30 қалада болған қақтығыстарда 42 полицей жараланған, 37 адам қамауға алынған. Нови-Садта да партия кеңсесі басып кіргендер тарапынан бүлінген. Ішкі істер министрі Ивица Дачич жағдайды «мемлекетке қарсы шабуыл» деп бағалап, қатаң шаралар қабылдауды талап етті.
Президент Вучич құқық қорғау жүйесіне реформа жасайтынын айтып, тәртіпсіздіктерге қатысқандардың көбірек ұстала бастағанын мәлімдеді. Бұған дейін ол «азаматтық соғысқа жол бермеу үшін Белград пен Нови-Сад көшелерін бұзақылардан тазарту қажет» деген болатын.
Толқулардың басты себебі – 2024 жылғы 1 қарашада Нови-Садтағы вокзалдың жаңа салынған бетон жабыны құлап, 16 адамның қаза табуы. Бұл оқиға билікке деген сенімсіздікті күшейтіп, елде соңғы онжылдықтағы ең ірі наразылықтарға түрткі болды. Қоғамдық пікірде трагедияға себеп ретінде жемқорлық пен құрылыс саласындағы жауапсыздық аталды.
Оқиғадан кейін құрылыс министрі Горан Весич отставкаға кетіп, кейін өзі және тағы оннан астам адам қамауға алынған. Қаңтарда премьер-министр Милош Вучевич қызметінен босатылды, ал наурызда жаңа үкіметті профессор Джуро Мацут басқарды.
